АНУ-ын Ерөнхийлөгч Доналд Трампын мэдээлснээр Европын удирдагчид ирэх долоо хоногийн Даваа эсвэл Мягмар гарагт АНУ-д айлчилж, Украйны дайныг зогсоох гарцыг хэлэлцэхээр болжээ.

Трамп мөн Оросын Ерөнхийлөгч Владимир Путинтэй ойрын хугацаанд уулзаж яриа өрнүүлэхээр төлөвлөж байгаагаа илэрхийлээд, Москвагийн эсрэг хориг арга хэмжээний хоёрдугаар шатанд орох бэлтгэл хангагдсан гэдгийг онцолсон байна.

Украины Ерөнхийлөгч Владимир Зеленский энэ санаачилгыг зөв гэж үзээд, Европын орнуудыг Оросын эрчим хүчийг худалдаж авахаа бүрэн зогсоохыг уриалав.

Энэ мэдэгдэл нь ОХУ Украйнд дайнаас хойшхи хамгийн том агаарын цохилтыг үйлдэж, дөрвөн хүний аминд хүрэн, Киевийн төв засгийн газрын барилгыг анх удаа онилсны дараа гарчээ. Тухайн довтолгооны үеэр Орос улс нийт 810 дрон, 13 пуужин ашигласан гэж мэдээлэгдсэн байна.

“Нөхцөл байдалд би сэтгэл хангалуун биш байна” гэж Трамп мэдэгдээд, тодорхой нэр дурдаагүй ч “Европын зарим удирдагчид ирэх Даваа эсвэл Мягмар гарагт тус тусдаа АНУ-д ирнэ” гэв.

ОХУ өнгөрсөн сард Аляскад болсон Трамп, Путин нарын дээд хэмжээний уулзалтаас хойш Украйнд довтолгоогоо эрчимжүүлээд байна.

Зеленский ABC News-д өгсөн ярилцлагадаа:
“Европын түншүүд маань Оросын нефть, хийг худалдаж авч байгаа нь шударга бус. Бид Оросоос ямар ч төрлийн эрчим хүч, ямар ч наймаа авахыг бүрэн зогсоох ёстой” гэжээ.

Тэрээр мөн Оростой худалдаа хийж буй улс орнуудад хоёрдогч тариф ногдуулах Трампын төлөвлөгөөг дэмжиж буйгаа илэрхийлэв.

Орос улс 2022 оны гуравдугаар сард Украйнд бүрэн хэмжээний довтолгоо эхэлснээс хойш нефть, хийний экспортоос ойролцоогоор 985 тэрбум ам.долларын орлого олсон гэж Эрчим хүч ба Цэвэр агаарын Судалгааны Төв мэдээлжээ. Үүний хамгийн том худалдан авагч нь Хятад, Энэтхэг хоёр байв.

Европын Холбоо (ЕХ) Оросын эрчим хүчний худалдан авалтаа эрс бууруулсан ч бүрэн зогсоогоогүй байна. Бруссель 2027 он гэхэд бүх худалдан авалтыг бүрмөсөн зогсоох төлөвлөгөөг гаргаад байгаа юм.

АНУ өнгөрсөн сард Оросын нефть худалдаж авч буй Энэтхэгийн бараанд 50%-ийн татвар ногдуулсан бөгөөд Энэтхэгийн засгийн газар өөрийн ард түмний эдийн засгийн ашиг сонирхолд нийцсэн “хамгийн сайн наймааг” үргэлжлүүлнэ гэж мэдэгджээ.

Харин өнгөрсөн долоо хоногт Бээжинд болсон уулзалтын үеэр ОХУ Хятадад хийн нийлүүлэлтээ нэмэгдүүлэхээ амласан байна.

ОПЕК+ бүлэг (Оросыг багтаасан нефть экспортлогч орнууд) дахин олборлолтоо нэмэгдүүлэхээр тохиролцсон нь дэлхийн зах зээл дээрх газрын тосны үнийг бууруулах хандлагатай болжээ.

АНУ-ын Сангийн сайд Скотт Бессент NBC телевизийн “Meet the Press” нэвтрүүлэгт өгсөн ярилцлагадаа:
“Хэрэв Европын улсууд Оросын нефть худалдаж авдаг орнуудад хоёрдогч тариф болон хатуу хориг тавивал Оросын эдийн засаг бүрэн унах бөгөөд энэ нь Путинийг хэлэлцээрийн ширээний ард суулгах болно” гэж онцолсон байна.

Тэрээр мөн: “Бид одоо Украйны цэргийн тэсвэр хатуужил ба Оросын эдийн засгийн тогтоц хоёрын аль түрүүлж нурах вэ гэсэн өрсөлдөөнтэй нүүр тулж байна” хэмээв.